ଭୁବନେଶ୍ୱର: ଭକ୍ତି ମୂଳରେ ଭଗବାନ । ଯଦି ଭକ୍ତିରେ କିଛି କାର୍ଯ୍ୟ କରାଯାଏ ତେବେ ସଫଳତା ଆପଣଙ୍କ ପାଦ ଛୁଇଁବ । ଯାହାକୁ ପ୍ରମାଣିତ କରି ଦେଖାଇଛନ୍ତି ଭଦ୍ରକ ଜିଲ୍ଲା ଧାମନଗର ଅଞ୍ଚଳ ସନ୍ତୋଷପୁର ଗ୍ରାମର ଭଗବାନ ବାରିକ । ନା ଯେମିତି କାମ ମଧ୍ୟ ସେମିତି । ଭଗବାନ ଆଜି ଏମିତି ଏକ କାମ କରିଛନ୍ତି ଯାହାକୁ ନେଇ ଗ୍ରାମବାସୀ ନିଜକୁ ଭାଗ୍ୟବାନ ମାନେ କରୁଛନ୍ତି। କାରଣ ଯେଉଁ ବୟସରେ ପିଲାମାନେ ନିଜ ସ୍ୱାର୍ଥ ପଛରେ ଧାଇଁଛନ୍ତି ସେହି ବୟସରେ ଭଗବାନ ସମୟ ବାହାର କରି ମନ୍ଦିର ନିର୍ମାଣ କରିଛନ୍ତି ।
ଧାମନଗର ସନ୍ତୋଷପୁର ଗ୍ରାମର ଗ୍ରାମ ଦେବତୀ ହେଉଛନ୍ତି ମା ସୁନାମୁଇଁ । ମାଙ୍କ ମନ୍ଦିରଟି ପ୍ରାୟ ୨୦୦ ବର୍ଷ ପୂର୍ବରୁ ପ୍ରତିଷ୍ଠା ହୋଇଥିଲା କିନ୍ତୁ ଗତ ବାତ୍ୟାରେ ଏକ ଗଛ ପଡ଼ି ମନ୍ଦିରଟି ସମ୍ପୂର୍ଣ୍ଣ ଭାବେ ଭାଙ୍ଗି ନଷ୍ଟ ହୋଇଯାଇଥିଲା। ମା ସୁନାମୁଇଁ ଅବହେଳିତ ଅବସ୍ଥାରେ ପଡି ରହିଥିଲେ । ଯାହାକୁ ଦେଖିବା ପରେ ନିଜକୁ ସମ୍ଭାଳି ପାରିନଥିଲେ ଭଗବାନ । ମନସ୍ତ କରିଥିଲେ ଯେତେ ଯାହା ହେଇଯାଉ ପଛେ ମାଙ୍କ ମନ୍ଦିର ନିର୍ମାଣ ହେବ । ଏଥିପାଇଁ ପ୍ରୟାସ ଆରମ୍ଭ କରିଥିଲେ ଭଗବାନ । ଗାଁ ଲୋକଙ୍କୁ ଏକାଠି କରି ମାଙ୍କ ମନ୍ଦିର ନିର୍ମାଣ ନେଇ ଆଲୋଚନା କରିଥିଲେ । ହେଲେ ଗାଁ ଲୋକେ ମନ୍ଦିର ନିର୍ମାଣ ନେଇ ଏତେ ଗୁରୁତ୍ୱ ଦେଇନଥିଲେ । ଶେଷରେ ଭଗବାନ ନିଜ କର୍ମ କ୍ଷେତ୍ରରୁ ମିଳୁଥିବା ମାସିକ ବେତନରୁ କିଛି କିଛି ଅର୍ଥ ସଂଚିତ କରିବାକୁ ଲାଗିଲେ। ଆଉ କିଛି ସହୃଦୟ ବ୍ୟକ୍ତି ଭଗବାନଙ୍କ ଏହି ମହତ ଉଦେଶ୍ୟରେ ସାରଥୀ ସାଜିଥିଲେ । ଦୀର୍ଘ ଦିନର ସଂଘର୍ଷ ପରେ ଶେଷରେ ମାଙ୍କ ମନ୍ଦିର ସମ୍ପୂର୍ଣ୍ଣ ହୋଇଛି । ଚଳିତ ମାସ ୭ ତାରିଖରେ ମା ସୁନାମୁଇଁଙ୍କ ମନ୍ଦିର ପ୍ରତିଷ୍ଠା କରାଯାଇଛି । ମା ଏବେ ନୂତନ କରି ନିର୍ମାଣ ହୋଇଥିବା ମନ୍ଦିରରେ ପୂଜା ପାଉଛନ୍ତି । ବିଳମ୍ବରେ ପଛେ ହେଉ ହେଲେ ଭଗବାନଙ୍କ ସ୍ବପ୍ନ ଆଜି ସାକାର ହେଇଛି ଯାହାକୁ ନେଇ ଗ୍ରାମବାସୀ ବେଶ ଖୁସି ।
