ପୁରୀ : ଆଜି ପବିତ୍ର ସ୍ନାନଯାତ୍ରା | ସ୍ନାନ ବେଦୀକୁ ବିଜେ କରିଛନ୍ତି ଚତୁର୍ଦ୍ଧାମୂର୍ତ୍ତି | ରଥଯାତ୍ରାର ଆଦ୍ୟପର୍ବ ତଥା ସ୍ନାନବେଦୀରେ ସମ୍ପୂର୍ଣ୍ଣ ନୀତିକାନ୍ତି ପରେ ହାତୀ ବେଶରେ ବିଶ୍ୱବାସୀଙ୍କୁ ଦର୍ଶନ ଦେଉଛନ୍ତି ମହାପ୍ରଭୁ |
ନିର୍ଘଣ୍ଟ ଅନୁଯାୟୀ, ନିଶାର୍ଦ୍ଧରେ ଘଣ୍ଟ, ଘଣ୍ଟା, କାହାଳୀ ବାଜିବା ସହ ଚତୁର୍ଦ୍ଧାମୂର୍ତ୍ତି ଧାଡ଼ି ପହଣ୍ଡିରେ ରତ୍ନ ସିଂହାସନରୁ ଓହ୍ଲାଇ ଆସିଥିଲେ ସ୍ନାନ ମଣ୍ଡପକୁ | ପ୍ରଥମେ ସୁଦର୍ଶନ,ପ୍ରଭୁ ବଳଭଦ୍ର ତା ପଛକୁ ଦେବୀ ସୁଭଦ୍ର ଓ ଶେଷରେ ବିଜେ କରିଥିଲେ ଶ୍ରୀ ଜଗନ୍ନାଥ | ମଙ୍ଗଳ ଆଳତି, ମଇଲମ, ତଡପଲାଗି, ଅଧର ପୋଛା ଶେଷ ହେବାପରେ ୧୦୮ ଗରା ଜଳରେ ସ୍ନାନ କରିଥିଲେ ଶ୍ରୀଜିଉ | ଏହି ମହାସ୍ନାନ ପରେ ଗଜବେଶ ଧାରଣ କରିଥିଲେ ମହାପ୍ରଭୁ |
ଗଜପତି ମହାରାଜା ଆଜି ଛେରାପହରା କଲେ ନାହିଁ | ତେବେ ଦିନ ୧୧ଟା ବେଳକୁ ଗଜପତିଙ୍କ ପ୍ରତିନିଧି ମୁଦିରସ୍ତ ଛେରାପହରା ବିଧି ସମ୍ପାଦନା ପରେ ଶ୍ରୀଜୀଉମାନଙ୍କ ହାତୀବେଶ କରାଗଲା |
କରୋନା କଟକଣାରେ ସମ୍ପୂର୍ଣ୍ଣ ରୀତିନୀତି ସହ ଆଗେଇ ଚାଲିଛି ଶ୍ରୀ ଜଗନ୍ନାଥ, ଶ୍ରୀ ବଳଭଦ୍ର, ଦେବୀ ସୁଭଦ୍ରା ଓ ସୁଦର୍ଶନଙ୍କ ନୀତିକାନ୍ତି | କରୋନା କଟକଣାକୁ ଦୃଷ୍ଟିରେ ରଖି ଏବର୍ଷ ମଧ୍ୟ ବିନା ଭକ୍ତରେ ଅନୁଷ୍ଠିତ ହେଉଛି ମହାପ୍ରଭୁଙ୍କ ସ୍ନାନଯାତ୍ରା |ସ୍ନାନଯାତ୍ରାରେ ନିୟୋଜିତ ସମସ୍ତ ସେବାୟତ, ପ୍ରଶାସନିକ କର୍ମଚାରୀ ଓ ପୋଲିସ କର୍ମଚାରୀଙ୍କ କୋଭିଡ ଟେଷ୍ଟ କାର୍ୟ୍ୟ ସମାପ୍ତ ହୋଇଛି | ଶ୍ରୀମନ୍ଦିର ଚତୁଃ ପାଶ୍ୱର୍ରେ ୧୪୪ ଧାରା ଲାଗୁ କରାଯାଇଛି |
