ଭୁବନେଶ୍ୱର : ଉତ୍ତରପ୍ରଦେଶରୁ ଏକ ବିଚିତ୍ର ଘଟଣା ସାମ୍ନାକୁ ଆସିଛି । କରୋନାରେ ଆକ୍ରାନ୍ତ ଜଣେ ବୃଦ୍ଧଙ୍କୁ ଗଛ ତଳେ ଶୁଆଇଦେଲେ ପରିବାର ଲୋକେ । ଦାଦ୍ରା ଗାଁରେ କରୋନାରେ ସଂକ୍ରମିତ ଜଣେ ବୃଦ୍ଧଙ୍କ ନିଶ୍ୱାସ ପ୍ରଶ୍ୱାସ ନେବାରେ ଅସୁବିଧା ହେବ କାରଣରୁ ତାଙ୍କୁ ପ୍ରଥମେ ଡାକ୍ତରଖାନା ନେଇଥିଲେ ପରିବାର ଲୋକେ ,ହେଲେ ଡାକ୍ତରଖାନାରେ ଶଯ୍ୟା ନ ପାଇବାରୁ ଶେଷରେ ପରିବାର ଲୋକେ ଏକ ଅଭିନବ ଉପାୟ ଅବଲମ୍ବନ କରିଥିଲେ । ଗାଁ ନିକଟରେ ଥିବା ଏକ ଅଶ୍ୱସ୍ତ ଗଛ ତଳେ ଖଟ ଉପରେ ବୃଦ୍ଧଙ୍କୁ ଶୁଆଇଦେଇଥିଲେ । ଗ୍ରାମବାସୀ ଦାବି କରିଥିଲେ ଯେ ଦୁଇ ଘଣ୍ଟା ମଧ୍ୟରେ ବୃଦ୍ଧଙ୍କର ଅମ୍ଳଜାନ ସ୍ତର ବୃଦ୍ଧି ପାଇଥିଲା । ତେବେ ଖବର ପ୍ରସାରଣ ହେବା ପରେ ବୃଦ୍ଧଙ୍କୁ ଶେଷରେ ଡାକ୍ତରଖାନାରେ ଭର୍ତ୍ତି କରାଯାଇଥିବା ଜଣାପଡିଛି ।
ସୂଚନାନୁସାରେ, ଗୋଲା PHC ଅଧୀନରେ ଥିବା ଦାଦ୍ରା ଗାଁର ଜଣେ ବୃଦ୍ଧ କରୋନାରେ ଆକ୍ରାନ୍ତ ହୋଇଥିଲେ । ଶୁକ୍ରବାର ଦିନ ତାଙ୍କୁ ନିଶ୍ୱାସ ନେବାରେ ଅସୁବିଧା ହୋଇଥିଲା। ଅମ୍ଳଜାନ ସ୍ତର ମଧ୍ୟ ସାମାନ୍ୟ ହ୍ରାସ ପାଇଥିଲା । ଚିନ୍ତିତ ପରିବାର ଡାକ୍ତରଖାନା ଖୋଜିବା ଆରମ୍ଭ କଲେ ଯାହା ଦ୍ୱାରା ବୃଦ୍ଧଙ୍କୁ ଚିକିତ୍ସା କରାଯାଇପାରିବ । ହେଲେ ବାରହାଲଗଞ୍ଜର ଦୁର୍ଗାବତୀ ଡାକ୍ତରଖାନାରେ ଗୋଟିଏ ବି ଶଯ୍ୟା ଖାଲି ନଥିଲା।
ଯେତେବେଳେ ଶଯ୍ୟା ମିଳିଲା ନାହିଁ, ପରିବାର ଲୋକେ ସିଏମଓ କାର୍ଯ୍ୟାଳୟର ଅବସରପ୍ରାପ୍ତ କର୍ମଚାରୀ ସୁଦର୍ଶନ ଶ୍ରୀବାସ୍ତବଙ୍କ ନିକଟକୁ ଯାଇଥିଲେ। ଯେତେବେଳେ ପରିବାରଲୋକେ ତାଙ୍କୁ ସାହାଯ୍ୟ ମାଗିଥିଲେ, ସେତେବେଳେ ସୁଦର୍ଶନ ସ୍ୱରାଜ ତାଙ୍କୁ କହିଥିଲେ ଯେ ,ବୃଦ୍ଧଙ୍କୁ ଏକ ଅଶ୍ୱସ୍ତ ଗଛ ତଳେ ଶୁଆଇଦେବାକୁ । କାରଣ ଅଶ୍ୱସ୍ତ ଗଛ ତଳେ ଅମ୍ଳଜାନ ଅଧିକ ମିଳିଥାଏ । ତେବେ ଏଭଳି ଅବସ୍ଥାରେ ଶଯ୍ୟା ନ ପାଇ ପରିବାର ଲୋକେ ଅସନ୍ତୁଷ୍ଟ ହୋଇ ଶେଷରେ ବୃଦ୍ଧଙ୍କୁ ଅଶ୍ୱସ୍ତ ଗଛ ତଳେ ଏକ ଖଟ ପକାଇ ଶୁଆଇଦେଇଥିଲେ। ଯାହାକି ଏବେ ପୁରା ଅଂଚଳରେ ଚହଳ ସୃଷ୍ଟି କରିଛି ।
