ଭୁବନେଶ୍ୱର : ରବିବାର ପାଟନା ସହରରେ ଅବସ୍ଥିତ ଗୁରୁଦ୍ୱାରର ଗେଷ୍ଟ ହାଉସରେ ଜଣେ ଯୁବକ ଆତ୍ମହତ୍ୟା କରିଥିବା ଘଟଣା ସାମ୍ନାକୁ ଆସିଛି। ଚୌକ ପୋଲିସ୍ ଷ୍ଟେସନ ଅଞ୍ଚଳର ବାଲଲିଲା ଗୁରୁଦ୍ୱାର ଅଧୀନରେ ଥିବା NRI ଗେଷ୍ଟ ହାଉସର ରୁମ୍ ନମ୍ବର -107 ରେ ଫେସବୁକ୍ ଲାଇଭ୍ କରିବା ପରେ ଜଣେ ପ୍ରେମିକ ଶେଷରେ ହତାଶ ହୋଇ ଆତ୍ମହତ୍ୟା କରିଥିବା ଜଣାପଡିଛି । ତେବେ ମୃତ୍ୟୁ ପୂର୍ବରୁ ପ୍ରେମିକ ଜଣକ ଫେସବୁକରେ ଲାଇଭ ଆସି ତାଙ୍କ ପ୍ରେମିକାକୁ କହିଥିଲେ ଯେ, ମୁଁ ଗଲା ପରେ ତୁମେ ତୁମର ଯତ୍ନ ନେଉଥିବ ଏବଂ ଠିକ ସମୟରେ ମେଡ଼ିସିନ ଖାଉଥିବ ।
ଘଟଣା ସମ୍ପର୍କରେ ସୂଚନା ପାଇବା ପରେ ପୋଲିସ ମୃତଦେହକୁ ଉଦ୍ଧାର କରିଥିଲା । ଏହି ଯୁବକ ଜଣକ ଉତ୍ତରପ୍ରଦେଶର ଶାମଲି ଜିଲ୍ଲା କାଦରଗଡର ବାସିନ୍ଦା ସର୍ଦ୍ଦାର ପରମଜିତ ସିଂହ ବୋଲି ଜଣାପଡିଛି। ପରମଜିତ୍ ସିଂହ ଅନେକ ଦିନ ଧରି ପର୍ଯ୍ୟଟକ ଭାବରେ ଗେଷ୍ଟ ହାଉସରେ ରହିଥିଲେ। ରବିବାର ଦିନ ୧୧ ଟା ସମୟରେ ନିଜେ ଗେଷ୍ଟ ହାଉସକୁ ଆସିଥିଲେ । ଦିନସାରା ସେ ନିଜ ପ୍ରେମିକା ସିମରନଙ୍କୁ ଭେଟିବାକୁ ଚେଷ୍ଟା କରୁଥିଲେ । ଯେତେବେଳେ ସିମରନ୍ ତାଙ୍କୁ ଭେଟିବାକୁ ମନା କରିଦେଲେ, ସେତେବେଳେ ସେ ଆତ୍ମହତ୍ୟା ଭଳି ଏକ ଚରମ ନିଷ୍ପତ୍ତି ନେଇଥିବା ଜଣାପଡିଛି । ତେବେ ପୋଲିସ ଏନେଇ ଏକ ମାମଲା ରୁଜୁ କରି ଘଟଣାର ତଦନ୍ତ କରୁଛି।
