ଭୁବନେଶ୍ୱର : ଆସନ୍ତା ୫ ତାରିଖରୁ ସାରା ରାଜ୍ୟରେ ଲକ୍ଡାଉନ୍ ଯୋଗୁ ପରିବା ଆଉ ସଉଦା ଦୋକାନରେ ଲୋକଙ୍କର ନାହିଁ ନ ଥିବା ଭିଡ ଦେଖିବାକୁ ମିଳିଛି | ଭିଡକୁ ଦେଖି ଗହଳି ନକରିବାକୁ ଅନୁରୋଧ କରିଛନ୍ତି ଏସ୍ଆର୍ସି ପ୍ରଦୀପ ଜେନା |
ରାଜ୍ୟରେ ହୁ ହୁ ହେଇ କରୋନା ଆକ୍ରାନ୍ତଙ୍କ ସଂଖ୍ୟା ବଢୁଥିବା ଦୃଷ୍ଟିରେ ରଖି ଆସନ୍ତା ୫ରୁ ୧୯ ତାରିଖ ପର୍ଯ୍ୟନ୍ତ ରାଜ୍ୟ ସରକାର ଲକ୍ଡାଉନ୍ ଘୋଷଣା କରିଛନ୍ତି | ଲକ୍ଡାଉନ୍ କୁ ଆଉ ମାତ୍ର ୨ ଦିନ ଥିବାରୁ ଲୋକେ ଅଯଥାରେ ଗହଳି କରିବା ଆରମ୍ଭ କରିଦେଇଛନ୍ତି | କାଳେ ଜିନିଷପତ୍ର ନମିଳିବ ସେଭଳି ଆଶଙ୍କା କରି ଆଜି ସକାଳଠାରୁ ରାଜ୍ୟର ବିଭିନ୍ନ ଦୋକାନ ବଜାରରେ ଅସମ୍ଭାଳ ଭିଡ ଦେଖିବାକୁ ମିଳିଥିଲା | ୧୫ ଦିନ ପାଇଁ ତାଲାବନ୍ଦ ଥିବା ସୂଚନା ପାଇଥିଲେ ବି ଲୋକେ ପ୍ରାୟ ମାସକ ପାଇଁ ପରିବା, ସଉଦା ବୋହିକି ନେଉଥିଲେ | କରୋନାକୁ ଡାକି ଆଣିବା ଭଳି ଭିଡର ଚିତ୍ର ସାରା ରାଜ୍ୟରୁ ଆସିବା ପରେ ରାଜ୍ୟବାସୀଙ୍କୁ ଏସଆରସି ଗହଳି ନକରିବାକୁ ଅନୁରୋଧ କରିଛନ୍ତି |
ଏସ୍ଆର୍ସି ପ୍ରଦୀପ ଜେନା କହିଛନ୍ତି, “ଲକ୍ଡାଉନ୍ ସମୟରେ ଅଧିକ ସାମଗ୍ରୀ କିଣିବା ପାଇଁ ବ୍ୟସ୍ତ ହୁଅନ୍ତୁନି କାରଣ ସୋମବାରଠାରୁ ଶୁକ୍ରବାର ସକାଳ ୬ଟାରୁ ୧୨ଟା ଯାଏ ଦୋକାନ ଖୋଲା ରହିବ | ପନିପରିବା, କ୍ଷୀର, ଗ୍ରୋସେରୀ, ମାଛ ଓ ଜରୁରୀ ସାମଗ୍ରୀ ଦୋକାନ ଖୋଲା ରହିବ | କେବଳ ଶନିବାର ଓ ରବିବାର ଦୋକାନ ବନ୍ଦ ରହିବ | ରାଜ୍ୟରେ ପର୍ଯ୍ୟପ୍ତ ପରିମାଣର ସାମଗ୍ରୀ ମହଜୁଦ ଅଛି |”
