ନବରଙ୍ଗପୁର : କୂଅ ସଫାକରିବାକୁ କୂଅ ଭିତରକୁ ପଶିଥିଲେ ହେଲେ ଶ୍ୱାସରୁଦ୍ଧ ହେଇ ଚାଲିଗଲା ୨ଟି ଜୀବନ ଆଉ ଜଣେ ଗୁରୁତର ହେଇ ଡାକ୍ତରଖାନାରେ ଚିକିତ୍ସିତ ହେଇଛନ୍ତି | ଏଭଳି ଦୁଃଖଦ ଖବର ନବରଙ୍ଗପୁର ଜିଲ୍ଲା ରାଇଘର ବ୍ଲକ ଅନ୍ତର୍ଗତ ହାଟଭରାଣ୍ଡି ପଂଚାୟତ ଅନ୍ତର୍ଗତ ସୋନାରପାରା ଗ୍ରାମରେ ଘଟିଯାଇଛି |
ସୂଚନା ଅନୁଯାୟୀ, ଆଜି ସକାଳ ୯ ଟା ସମୟରେ ସୋନାରପାରା ଗ୍ରାମର ରାଜୁ କେଉଟଙ୍କ କୂଅଟିକୁ ସଫା କରିବାକୁ ସେହି ଗ୍ରାମର ହେମରଜ ହାଲବା ଓ ଅନୁପ କେଉଟଙ୍କ ସହିତ ତା ଭିତରେ ପଶି ଥିଲେ | କୂଅ ଭିତରେ ପାଣି କମ୍ ଥିବାରୁ ସେଠାରେ ତିନିହେଁ ସଫେଇ କାମ ଆରମ୍ଭ କରିଥିଲେ | କାମ କରିବାର କିଛି ସମୟ ମଧ୍ୟରେ ସେମାନେ ଅଣନିଶ୍ୱାସ ହୋଇ ଛଟପଟ ହୋଇଥିଲେ l କୂଅ ବାହାରେ ଥାଇ ଦେଖୁଥିବା ଲୋକେ ଉଦ୍ଧାର କରିବାକୁ ଯାଇ ବିଫଳ ହେବା ପରେ କୁନ୍ଦେଇ ପୁଲିସ ଓ ରାଇଘର ଅଗ୍ନିଶମ ବିଭାଗକୁ ଖବର ଦେଇଥିଲେ | ଘଟଣା ସ୍ଥଳରେ ଦମକଳ ବାହିନୀ ପହଞ୍ଚି ସେମାନଙ୍କୁ ଉଦ୍ଧାର କରିବା ବେଳକୁ ହେମରାଜ ଓ ଅନୁପ ମୃତ୍ୟୁବରଣ କରି ସାରିଥିଲେ l ଅପରପକ୍ଷରେ ରାଜୁଙ୍କୁ ଉଦ୍ଧାର କରିବା ପରେ ସେ ଗୁରୁତର ଥିବାରୁ ତାଙ୍କୁ ହାଟଭରାଣ୍ଡି ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା | ଖବର ପାଇ କୁନ୍ଦେଇ ଥାନା ଅଧିକାରୀ ଫକୀର ମୋହନ ଖରା, ରାଇଘର ତହସିଲଦାର ଜଗୁ ପୁଜାରୀ,ବିଡିଓ ଦେବେନ୍ଦ୍ର ପ୍ରସାଦ ବଳ ପ୍ରମୁଖ ଘଟଣାସ୍ଥଳରେ ପହଞ୍ଚିଥିଲେ | ରାଜୁ କେଉଟଙ୍କ ସ୍ୱାସ୍ଥ୍ୟ ଅବସ୍ଥା ଏବେ ସ୍ଥିର ଥିବା ଜଣାପଡିଛି |
