ସମ୍ବଲପୁର : ଜାତୀୟ ପୁରସ୍କାର ପ୍ରାପ୍ତ ଅଭିନେତା ଅଟଳ ବିହାରୀ ପଣ୍ଡାଙ୍କ ପରଲୋକ ଗମନ | ସେ ବ୍ଲଡ୍ ସେପ୍ଟିସେମିଆରେ ପୀଡ଼ିତ ହୋଇ ଗତ ୧୦ ଦିନ ଧରି ବୁର୍ଲା ଡ଼ାକ୍ତରଖାନାରେ ଚିକିତ୍ସିତ ହେଉଥିଲେ ଏହି ବରିଷ୍ଠ ଅଭିନେତା | ବିଳମ୍ବିତ ରାତି ୩ଟା ୪୫ ମିନିଟ ସମୟରେ ସେ ଶେଷ ନିଶ୍ୱାସ ତ୍ୟାଗକରିଛନ୍ତି ବୋଲି ତାଙ୍କ ସାନ ପୁଅ ସୂଚନା ଦେଇଛନ୍ତି | ମୃତ୍ୟୁ ବେଳକୁ ତାଙ୍କୁ ୯୨ ବର୍ଷ ହୋଇଥିଲା |
ଓଡ଼ିଆ ସିନେମା ଜଗତର ବିଶିଷ୍ଟ କଳାକାର ଥିଲେ ସ୍ୱର୍ଗତ ଅଟଳ ବିହାରୀ ପଣ୍ଡା | ସେ ଏକାଧାରରେ ଥିଲେ ଗୀତିକାର, ନାଟ୍ୟକାର, ଥିଏଟରବିତ ଏବଂ ଚଳଚ୍ଚିତ୍ର ଅଭିନେତା | ସୁବର୍ଣ୍ଣପୁର ଜିଲ୍ଲାର ବିନିକା ଠାରେ ସେ ଜନ୍ମଗ୍ରହଣ କରିଥିଲେ | ସେ ୧୯୪୪ ପରଠାରୁ ନାଟକରେ ଅଭିନୟ ଆରମ୍ଭ କରିଥିଲେସେ | ସମ୍ବଲପୁରୀ ଭାଷାରେ ଶତାଧିକ ନାଟକରେ ଅଭିନୟ କରିବା ସହ ଅନେକ ନାଟକ ରଚନା କରିଥିଲେ | ନିଜର ପ୍ରଥମ ସମ୍ବଲପୁରୀ ଫିଲ୍ମ ‘ଶଲାବୁଢ଼ା’ ରେ ସେ ମୁଖ୍ୟ ଚରିତ୍ରରେ ଅଭିନୟ କରି ସେ ଓଡ଼ିଶାର ପ୍ରତି ଘରେ ଘରେ ପରିଚିତ ଥିଲେ | ଆଉ ଏହି ଚଳଚ୍ଚିତ୍ର ପାଇଁ ଶ୍ରେଷ୍ଠ ଅଭିନେତା ଭାବେ ରାଜ୍ୟ ଚଳଚ୍ଚିତ୍ର ପୁରସ୍କାର ହାତେଇଥିଲେ ସେ | ସ୍ୱର୍ଗତ ପଣ୍ଡା ‘ଶଲାବୁଢ଼ା’ର ସିକ୍ୱେଲ୍ ‘ଆଦିମ ବିଚାର’ରେ ମଧ୍ୟ ଅଭିନୟ କରିଥିଲେ | ୨୦୨୦ରେ ‘ଶଲାବୁଢ଼ା’ ସିରିଜ୍ର ତୃତୀୟ ଫିଲ୍ମ ‘ଶଲାବୁଢ଼ାର ବଦଲା’ରେ ମଧ୍ୟ ସେ ଅଭିନୟ କରିଥିଲେ | ଆଉଥରେ ‘ଶଲାବୁଢ଼ା’ ଦେଖିବାର ସ୍ୱପ୍ନ ଅଧା ହେଇ ରହିଗଲା |
ସେ ଦୀର୍ଘ ଦିନ ହେବ ମଧୁମେହ ରୋଗରେ ପୀଡିତ ଥିଲେ | ମେ’ ୧୬ ତାରିଖରେ ପତ୍ନୀ ଲଳିତା ପଣ୍ଡାଙ୍କର ଦେହାନ୍ତ ହୋଇଥିଲା | ହଠାତ ଧର୍ମପତ୍ନୀଙ୍କ ଦେହାନ୍ତ ତାଙ୍କୁ ଅଧିକ ରୋଗାକ୍ରାନ୍ତ କରିଦେଇଥିଲା | ମେ’ ୧୯ ତାରିଖରେ ତାଙ୍କୁ ବୁର୍ଲା ଡାକ୍ତରଖାନାରେ ଭର୍ତ୍ତି କରାଯାଇଥିଲା | ତେବେ ଅବସ୍ଥା ଗୁରୁତର ହେବାରୁ ତାଙ୍କୁ ଆଇସିୟୁରେ ଭର୍ତ୍ତି କରାଯାଇଥିଲା |
